ಭಟ್ಕಳ | ಬ್ಯಾಂಕ್ ಉದ್ಯೋಗಿಗೆ ಕಾಡಿಸಿದ ವಿಧಾನಸೌಧದ ನೌಕರ!

ಬೆಂಗಳೂರಿನ ವಿಧಾನಸೌಧದಲ್ಲಿ ಕೆಲಸ ಮಾಡುವ ಅರವಿಂದ ಮಳ್ಳೂರು ಅವರು ಭಟ್ಕಳ ಮೂಲದ ಮಹಿಳಾ ಬ್ಯಾಂಕ್ ಉದ್ಯೋಗಿಯೊಬ್ಬರ ಬೆನ್ನು ಬಿದ್ದಿದ್ದಾರೆ. `ನಾ ನಿನ್ನ ಪ್ರೀತಿಸುವೆ. ನಿನ್ನ ನನ್ನ ಮದುವೆ ಆಗು’ ಎಂದು ಅವರು ಆ ಯುವತಿಯನ್ನು ಕಾಡಿಸುತ್ತಿದ್ದಾರೆ.

ADVERTISEMENT

ಭಟ್ಕಳದ ಸರ್ಪನಕಟ್ಟೆ ಬಳಿಯ ಹಡೀನದಲ್ಲಿ ನವ್ಯಶ್ರೀ ನಾಯ್ಕ (ಹೆಸರು ಬದಲಿಸಿದೆ) ಅವರು ವಾಸವಾಗಿದ್ದಾರೆ. 27 ವರ್ಷದ ಅವರು ಬ್ಯಾಂಕ್ ಉದ್ಯೋಗಿಯಾಗಿದ್ದಾರೆ. ಬೆಂಗಳೂರಿನಲ್ಲಿ ಅವರು ಕೆಲಸ ಮಾಡುತ್ತಿದ್ದು, ಅಲ್ಲಿಯೇ ಅವರಿಗೆ ಅರವಿಂದ ಮಳ್ಳೂರು ಅವರು ಪರಿಚಯವಾಗಿದ್ದಾರೆ. ಮೈಸೂರು ಮೂಲದ ಅರವಿಂದ ಮಳ್ಳೂರು ಅವರು ವಿಧಾನಸೌಧದ ಕಾರ್ಯದರ್ಶಿ ಕಚೇರಿಯ ಉದ್ಯೋಗಿ ಆಗಿದ್ದಾರೆ. ನವ್ಯಶ್ರೀ ನಾಯ್ಕ ಅವರ ಸಲುಗೆ ಬೆಳಸಿದ ಅರವಿಂದ ಮಳ್ಳೂರು ಅವರು ಕ್ರಮೇಣ ಅವರನ್ನು ಪುಸಲಾಯಿಸಲು ಶುರು ಮಾಡಿದ್ದಾರೆ. ಪ್ರೀತಿ-ಪ್ರೇಮ ಎಂದು ಹೇಳಿ ಪ್ರಪೋಸ್ ಮಾಡಿದ್ದಾರೆ.

ಆದರೆ, ನವ್ಯಶ್ರೀ ನಾಯ್ಕ ಅವರು ಅರವಿಂದ ಮಳ್ಳೂರು ಅವರ ಪ್ರೇಮದ ಕೋರಿಕೆ ಒಪ್ಪಿಲ್ಲ. ಇದರಿಂದ ಸಿಟ್ಟಾದ ಅರವಿಂದ ಮಳ್ಳೂರು ಅವರು ನವ್ಯಶ್ರೀ ನಾಯ್ಕ ಅವರ ಕುಟುಂಬದವರಿಗೆ ಕಾಟ ಕೊಡಲು ಶುರು ಮಾಡಿದ್ದಾರೆ. ಅವರ ಕುಟುಂಬದವರಿಗೆ ಫೋನ್ ಮಾಡಿ ಬೆದರಿಸಿದ್ದಾರೆ. ಜೊತೆಗೆ ಭಟ್ಕಳಕ್ಕೆ ಆಗಮಿಸಿದ್ದು, ಸೋಡಿಗದ್ದೆ ಬಳಿಯ ರಿಕ್ಷಾ ಚಾಲಕರಿಗೆ ನವ್ಯಶ್ರೀ ನಾಯ್ಕ ಅವರ ಫೋಟೋ ಕಾಣಿಸಿದ್ದಾರೆ. `ತಾನು ಆಕೆಯನ್ನೇ ಮದುವೆ ಆಗುವೆ’ ಎಂದು ಊರಿನ ತುಂಬ ಡಂಗೂರ ಸಾರಿದ್ದಾರೆ. `ನೀ ಸಿಗದಿದ್ದರೆ ಸಾಯುವೆ’ ಎಂದು ನವ್ಯಶ್ರೀ ನಾಯ್ಕ ಅವರಿಗೂ ಮೆಸೆಜ್ ಮಾಡಿದ್ದಾರೆ. ಅರವಿಂದ ಮಳ್ಳೂರು ಅವರ ಆ ಕಾಟ ಸಹಿಸಲಾಗದೇ ಮೂರು ತಿಂಗಳ ಹಿಂದೆ ನವ್ಯಶ್ರೀ ನಾಯ್ಕ ಅವರ ತಂದೆ ವೆಂಕಟ್ರಮಣ ನಾಯ್ಕ ಅವರು ಸಾವನಪ್ಪಿದ್ದಾರೆ.

ಅದಾಗಿಯೂ, ಅರವಿಂದ ಮಳ್ಳೂರು ಅವರು ನವ್ಯಶ್ರೀ ನಾಯ್ಕ ಅವರಿಗೆ ಕಾಡಿಸುವುದನ್ನು ಬಿಟ್ಟಿಲ್ಲ. ಈ ಹಿನ್ನಲೆ ಎರಡು ವಾರದ ಹಿಂದೆ ನವ್ಯಶ್ರೀ ನಾಯ್ಕ ಅವರ ಸಹೋದರ ಚರಣ ನಾಯ್ಕ ಅವರು ಪೊಲೀಸರ ಮೊರೆ ಹೋಗಿದ್ದಾರೆ. ಅರವಿಂದ ಮಳ್ಳೂರು ಅವರಿಂದ ರಕ್ಷಣೆ ಕೊಡುವಂತೆ ಕೋರಿದ ಅವರು ಕಾನೂನು ಕ್ರಮಕ್ಕೂ ಒತ್ತಾಯಿಸಿದ್ದಾರೆ.