- Trending
- Comments
- Latest
ಹೊನ್ನಾವರದ ಇಡಗುಂಜಿಯಲ್ಲಿ ಕಾಸಿನ ವಿಚಾರವಾಗಿ ಅರ್ಚಕರ ನಡುವಿನ ಕಚ್ಚಾಟ ಮುಂದುವರೆದಿದೆ. ಕಾಸಿನ ವಿಚಾರದಲ್ಲಿ ಕೆಂಡಾಮoಡಲರಾಗಿರುವ ಅರ್ಚಕರು ದೇವರ ಪೂಜೆಯನ್ನು ಬಹಿಷ್ಕರಿಸಿದ್ದಾರೆ. ಹೀಗಾಗಿ ಪೂಜೆಗಾಗಿ ಸಾಲಿನಲ್ಲಿ ನಿಂತಿದ್ದ ಭಕ್ತರು ದೇವರ ದರ್ಶನ ಮಾತ್ರ ಮಾಡಿ, ಮುಂದೆ ಸಾಗಿದ್ದಾರೆ.
ಇಡಗುಂಜಿ ದೇಗುಲದಲ್ಲಿ ಪ್ರತಿ ದಿನ ದೇವರಿಗೆ ತ್ರಿಕಾಲ ಅಭಿಷೇಕ ನಡೆಯುತ್ತದೆ. ಆದರೆ, ಭಾನುವಾರ ಬೆಳಗ್ಗೆಯ ಪೂಜೆ ನಡೆದಿಲ್ಲ. ಈ ದಿನ ಗರ್ಭಗುಡಿಯಲ್ಲಿದ್ದ ಗಣಪತಿ ದೇವರ ಅರ್ಚಕರು ಹೋಗಿಲ್ಲ. ದೇವಾಲಯದಲ್ಲಿನ ಪೂಜೆಯ ಹಕ್ಕು ಹಾಗೂ ಕಮಿಷನ್ ವಿಚಾರವಾಗಿ ಮೊದಲಿನಿಂದಲೂ ವಿವಾದಗಳಿವೆ. ಇಲ್ಲಿ ಮೂರು ಅರ್ಚಕರ ಕುಟುಂಬಗಳಿದ್ದು, ಪಾಳಿ ಪ್ರಕಾರ ಅವರು ಪೂಜೆ ನೆರವೇರಿಸುತ್ತಿದ್ದಾರೆ. ಸದ್ಯ ಮಂಜುನಾಥ ಭಟ್ಟ ಅವರ ಪಾಳಿ ನಡೆಯುತ್ತಿದೆ. ಇದೇ ವೇಳೆ, ನಾರಾಯಣ ಭಟ್ಟ ಅವರ ಕುಟುಂಬದವರು ಪೂಜಾ ಕಮಿಷನ್ ಹಣದ ವಿಚಾರವಾಗಿ ನ್ಯಾಯಾಲಯದಲ್ಲಿ ದಾವೆ ಹೂಡಿದೆ. ನ್ಯಾಯಾಲಯದ ಆದೇಶ ಹೊರಬರುವವರೆಗೆ ಕಮಿಷನ್ ಹಣ ಕೊಡಬಾರದು ಎಂದು ಮನವಿಯೂ ಸಲ್ಲಿಕೆಯಾಗಿದ್ದು, ಕಳೆದ ನಾಲ್ಕು ತಿಂಗಳಿನಿoದ ಆ ಹಣ ಪಾವತಿ ಆಗಿಲ್ಲ. ಹೀಗಾಗಿ ಮಂಜುನಾಥ ಭಟ್ಟ ಅವರು ನವರಾತ್ರಿ ಮೊದಲ ದಿನದಿಂದ ಪೂಜೆ ಮಾಡಲು ಹೋಗಿಲ್ಲ.
ಅರ್ಚಕರು ಹಾಗೂ ಆಡಳಿತ ಮಂಡಳಿ ನಡುವಿನ ಭಿನ್ನಾಭಿಪ್ರಾಯದಿಂದಾಗಿ ದೇಗುಲದಲ್ಲಿ ಪೂಜಾ ಸೇವೆಗೆ ಭಗ್ನ ಉಂಟಾಗಿದೆ. ನವರಾತ್ರಿ ಮೊದಲ ದಿನವೇ ಪೂಜೆ ನಡೆಯದ ಕಾರಣ ಭಕ್ತರು ಅಸಮಾಧಾನಿತರಾಗಿದ್ದಾರೆ. ದೇಗುಲದ ಆಡಳಿತ ಮಂಡಳಿ ಪೂಜಾ ವಸ್ತುಗಳಿಗೆ ನೀಡುವ ಕಮಿಷನ್ ವಿಚಾರದಲ್ಲಿ ಬಿನ್ನಾಭಿಪ್ರಾಯ ಮುಂದುವರೆದಿದ್ದು, ಈ ಹಿನ್ನಲೆ ಅರ್ಚಕರು ದೇವರ ಪೂಜೆಯಿಂದ ದೂರ ಸರಿದಿದ್ದಾರೆ. ಈ ದಿನ ದೇವರ ಪೂಜೆಗೆ ಬಂದಿದ್ದ ಭಕ್ತರು ದೂರದಿಂದಲೇ ದರ್ಶನ ಮಾಡಿದ್ದಾರೆ. ಹಣ್ಣು-ಕಾಯಿಗಳನ್ನು ದೇವರ ಮುಂದಿಟ್ಟು ಕೈ ಮುಗಿದಿದ್ದಾರೆ. ಎಲ್ಲರೂ ಹೊರಗಿನಿಂದಲೇ ದರ್ಶನಪಡೆದು ಮರಳಿದ್ದಾರೆ.
You cannot copy content of this page
