ಮರಕ್ಕೆ ಗುದ್ದಿದ ಕಾರು: ಎರಡು ದೇಹ ಚೂರು ಚೂರು!

ದಾಂಡೇಲಿಯ ಕರ್ಕಾ ಕ್ರಾಸಿನ ಅಜಗೌನ್ ಬಳಿ ಸೋಮವಾರ ರಾತ್ರಿ ಕಾರು ಅಪಘಾತಕ್ಕೀಡಾಗಿದೆ. ಅಪಘಾತದ ರಭಸಕ್ಕೆ ಕಾರಿನಲ್ಲಿದ್ದ ಪ್ರಯಾಣಿಕರಿಬ್ಬರು ಅಲ್ಲಿಯೇ ಸಾವನಪ್ಪಿದ್ದಾರೆ.

ADVERTISEMENT

ಧಾರವಾಡದ ಫಾರೂಖ್ ಸಾಬ್ ಹಾಗೂ ಹಳಿಯಾಳದ ಮುದಸ್ಸಿರ್ ಇಸ್ಮಾಯಿಲ್ ಮುಲ್ಲಾ ಅವರು ಮತ್ತೊಬ್ಬರ ಜೊತೆ ಈ ಮಾರ್ಗವಾಗಿ ಹೋಗುತ್ತಿದ್ದರು. ಚಾಲಕನ ನಿಯಂತ್ರಣ ತಪ್ಪಿದ ಕಾರು ಮರಕ್ಕೆ ಗುದ್ದಿತು. ಎರಡು ಮರಗಳ ನಡುವೆ ಕಾರು ಸಿಲುಕಿದ್ದರಿಂದ ವಾಹನ ಮುಂದಿನ ಭಾಗ ಸಂಪೂರ್ಣವಾಗಿ ಪುಡಿಪುಡಿಯಾಯಿತು. ಆ ಕಾರಿನಲ್ಲಿದ್ದವರು ಸಹ ಅಲ್ಲಿಯೇ ಸಿಲುಕಿದ್ದು, ಹೊರಬರಲಾಗದೇ ಕೊನೆಯುಸಿರೆಳೆದರು.

ಆ ಕಾರಿನಲ್ಲಿದ್ದ ಮತ್ತೊಬ್ಬರು ನರಳಾಡುತ್ತಿದ್ದು, ಅವರನ್ನು ಸ್ಥಳೀಯರು ರಕ್ಷಿಸಿದ್ದಾರೆ. ಗಾಯಗೊಂಡ ಮತ್ತೊಬ್ಬ ಪ್ರಯಾಣಿಕರನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಲಾಗುತ್ತಿದೆ. ಜೀವಾಪಾಯದಿಂದ ಪಾರಾದವರು ಆ ಕಾರಿನ ಚಾಲಕರಾಗಿದ್ದು, ದಾಂಡೇಲಿ ಗ್ರಾಮೀಣ ಠಾಣೆಯ ಪಿಸೈ ಶಿವಾನಂದ ನಾವಲಗಿ ಅವರು ಸ್ಥಳಕ್ಕೆ ಭೇಟಿ ನೀಡಿ ವಿಚಾರಣೆ ನಡೆಸಿದ್ದಾರೆ.