ಬೆಂಕಿಯಲ್ಲಿ ಬೆಂದ ಮಹಿಳೆ: ಸಾವು!

ಅಡುಗೆ ಮಾಡುವುದಕ್ಕಾಗಿ ಒಲೆ ಉರಿಸಿದ್ದ ಹೊನ್ನಾವರದ ಸವಿತಾ ಅಂಬಿಗ ಅವರು ಅದೇ ಒಲೆಯ ಬೆಂಕಿಗೆ ಆಹುತಿಯಾಗಿದ್ದಾರೆ. ಬೆಂಕಿಯ ಜ್ವಾಲೆಗೆ ಮೈ ಸುಟ್ಟ ಪರಿಣಾಮ ಅವರನ್ನು ಆಸ್ಪತ್ರೆಗೆ ದಾಖಲಿಸಿ ಆರೈಕೆ ಮಾಡಿದರೂ ಪ್ರಯೋಜನವಾಗಿಲ್ಲ.

ಕುಮಟಾ ಹೆಗಡೆಯ ಸವಿತಾ ಅಂಬಿಗ (37) ಅವರು ಹೊನ್ನಾವರದ ಮಾವಿನಕೂರ್ವಾ ಬಳಿಯ ಮಂಡಲಕೂರ್ವಾದ ಸುಬ್ರಾಯ ಅಂಬಿಗ ಅವರನ್ನು ಮದುವೆ ಆಗಿದ್ದರು. ಎಂಟು ವರ್ಷದ ಹಿಂದೆ ಸುಬ್ರಾಯ ಅಂಬಿಗ ಅವರು ನಿಧನರಾಗಿದ್ದು, ತಮ್ಮ ಇಬ್ಬರು ಮಕ್ಕಳ ಜೊತೆ ಅವರು ವಾಸವಾಗಿದ್ದರು. ಜನವರಿ 20ರಂದು ಮನೆಯಲ್ಲಿ ಅವರು ಅಡುಗೆ ಮಾಡುತ್ತಿರುವಾಗ ಕಟ್ಟಿಗೆ ಒಲೆಯ ಬೆಂಕಿ ಅವರು ಧರಿಸಿದ್ದ ಬಟ್ಟೆಗೆ ತಾಗಿತು.

ADVERTISEMENT

ಬೆಂಕಿಯ ಜ್ವಾಲೆಗೆ ಸವಿತಾ ಅಂಬಿಗ ಅವರ ಮೈ ಸುಟ್ಟಿತು. ಗಾಯಗೊಂಡ ಅವರನ್ನು ಹೊನ್ನಾವರ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಯಿತು. ಅದಾದ ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಕಾರವಾರ ಜಿಲ್ಲಾಸ್ಪತ್ರೆಗೆ ಕರೆದೊಯ್ಯಲಾಯಿತು. ಆದರೆ, ಚಿಕಿತ್ಸೆ ಫಲಕಾರಿಯಾಗದ ಕಾರಣ ಏಪ್ರಿಲ್ 2ರಂದು ಅವರು ಸಾವನಪ್ಪಿದರು. ಸಹೋದರಿ ಸಾವಿನ ಬಗ್ಗೆ ಕುಮಟಾ ಹೆಗಡೆಯ ಮೋಹನ ಮಾದೇವ ಅಂಬಿಗ ಅವರು ಮಾಹಿತಿ ನೀಡಿದ್ದು, ಹೊನ್ನಾವರ ಪೊಲೀಸರು ಪ್ರಕರಣ ದಾಖಲಿಸಿದರು.