ಅಂಕೋಲಾ | ಕೋಣ ಸಾಗಾಟಗಾರರ ಸೆರೆ!

ತಾಡಪತ್ರೆ ಮುಚ್ಚಿದ ಮಿನಿ ಲಾರಿಯಲ್ಲಿ ಕೋಣಗಳನ್ನು ಸಾಗಿಸಲಾಗುತ್ತಿದ್ದು, ಪೊಲೀಸರು ಹಿಡಿಯುವುದರೊಳಗೆ ಎರಡು ಕೋಣಗಳು ಸಾವನಪ್ಪಿದೆ. ವಧೆಗೆ ಹೋಗುತ್ತಿದ್ದ ಇನ್ನಷ್ಟು ಕೋಣಗಳಿಗೆ ಅಂಕೋಲಾ ಪೊಲೀಸರು ಜೀವದಾನ ಮಾಡಿದ್ದಾರೆ.

ಅಗಸ್ಟ 2ರಂದು ಅಂಕೋಲಾದ ಬಾಳೆಗುಳಿ ಕ್ರಾಸಿನ ಬಳಿ ಮಿನಿ ಲಾರಿಯೊಂದು ನಿಂತಿತ್ತು. ತಾಡಪತ್ರೆ ಹೊದಸಿದ ಆ ಲಾರಿ ಒಳಗಿನಿಂದ ದನಗಳ ಕೂಗು ಜೋರಾಗಿತ್ತು. ಅದನ್ನು ಕೇಳಿದ ಜನ ಪೊಲೀಸರಿಗೆ ಫೋನ್ ಮಾಡಿದ್ದರು. ಚಹ ಅಂಗಡಿ ಮುಂದೆ ನಿಂತಿದ್ದ ಮಿನಿ ಲಾರಿ ಅನುಮಾನ ಹೆಚ್ಚಿಸಿದ್ದು, ಪಿಸೈ ಗುರುನಾಥ ಹಾದಿಮನಿ ಅವರು ಆ ಲಾರಿಯನ್ನು ವಶಕ್ಕೆಪಡೆದರು.

ಒಳಗಿದ್ದ ಜಾನುವಾರುಗಳನ್ನು ಗಮನಿಸಿದಾಗ ಅಲ್ಲಿ ಎರಡು ಕೋಣಗಳು ಸಾವನಪ್ಪಿದ್ದವು. ನೀರು-ಆಹಾರವಿಲ್ಲದೇ ಬಳಲಿದ್ದ ಇನ್ನಷ್ಟು ಜಾನುವಾರುಗಳನ್ನು ಪೊಲೀಸರು ಕಟುಕರಿಂದ ತಪ್ಪಿಸಿದರು. 12 ಕೋಣದ ಮರಿಗಳ ಪೈಕಿ ಎರಡು ಸಾವನಪ್ಪಿದ್ದರಿಂದ 10 ಜೀವಗಳು ಅಲ್ಲಿ ಸಿಲುಕಿದ್ದವು. ಅವುಗಳಿಗೆ ಪೊಲೀಸರು ನೀರು-ಮೇವು ನೀಡಿ ಉಪಚಾರ ಮಾಡಿದರು.

ಅಕ್ರಮ ಜಾನುವಾರು ಸಾಗಾಟ ಮಾಡುತ್ತಿದ್ದ ಲಾರಿಯನ್ನು ಪೊಲೀಸರು ವಶಕ್ಕೆಪಡೆದರು. ಜೊತೆಗೆ ಈ ಕೃತ್ಯದಲ್ಲಿ ಭಾಗಿಯಾಗಿದ್ದ ಜಾಕೀರ ಹಾಗೂ ಮನೋಜ ಪಡಿಯಪ್ಪ ಎಂಬಾತರನ್ನು ಬಂಧಿಸಿದರು.