ಕುಮಟಾ | ಈ ಕೆಲಸ ಮನೆಯಲ್ಲಿಯೇ ಮಾಡಿದರೂ ಅಪರಾಧ!

ಸೊಪ್ಪಿನಹೊಸಳ್ಳಿಯ ರಜತ ನಾಯಕ ಅವರು ಮನೆಯಲ್ಲಿ ಮಲಗಿದ್ದರೂ ಪೊಲೀಸರು ಅವರನ್ನು ಹಿಡಿದು ಬಂಧಿಸಿದ್ದಾರೆ. ಕಾರಣ, ಅವರು ಮನೆಯಲ್ಲಿರುವಾಗಲೂ ಮಾದಕ ವ್ಯಸನ ಸೇವಿಸಿ ಸಿಕ್ಕಿ ಬಿದ್ದಿದ್ದಾರೆ!

ಕುಮಟಾ ಸೊಪ್ಪಿನಹೊಸಳ್ಳಿಯ ಮೂಡಗಿಯಲ್ಲಿ ರಜತ ಭಾಸ್ಕರ ನಾಯಕ ಅವರು ವಾಸವಾಗಿದ್ದಾರೆ. 30 ವರ್ಷದ ಅವರು ಸಣ್ಣ ವಯಸ್ಸಿನಲ್ಲಿಯೇ ದಾರಿ ತಪ್ಪಿದ್ದು, ಮೋಜು-ಮಸ್ತಿಗಾಗಿ ಮಾದಕ ವ್ಯಸನದ ಹಿಂದೆ ಬಿದ್ದಿದ್ದಾರೆ. ಮಾಡಲು ಏನೂ ಕೆಲಸವಿಲ್ಲದಿದ್ದಾಗ ಅವರು ಗಾಂಜಾ ಸೇವಿಸಿ ಅಲೆದಾಡುತ್ತಿದ್ದು, ಜುಲೈ 21ರಂದು ಸಹ ಹಾಗೇ ನಶೆಯಲ್ಲಿರುವಾಗ ಕುಮಟಾ ಪಿಐ ಯೋಗೇಶ್ ಕೆ ಎಂ ಅವರ ಬಳಿ ಸಿಕ್ಕಿ ಬಿದ್ದಿದ್ದಾರೆ.

ರಜತ ನಾಯಕ ಅವರು ಕೂಲಿ ಕೆಲಸ ಮಾಡುವವರಾಗಿದ್ದು, ದುಡಿಮೆಯ ಎಲ್ಲಾ ಹಣವನ್ನು ಮನೆಗೆ ಕೊಡುತ್ತಿಲ್ಲ. ವಾಸದ ಮನೆ ಮುಂದೆಯೇ ಅವರು ಮಾದಕ ವ್ಯಸನ ಸೇವಿಸುತ್ತಿದ್ದು, ಇದನ್ನು ನೋಡಿದವರು ಪೊಲೀಸರಿಗೆ ಫೋನ್ ಮಾಡಿದ್ದಾರೆ. ವ್ಯಸನ ಮುಗಿಸಿ ಮನೆಗೆ ಮರಳುತ್ತಿದ್ದ ಅವರನ್ನು ಪೊಲೀಸರು ಹತ್ತಿರ ಕರೆದು ವಿಚಾರಿಸಿದ್ದಾರೆ. ಅಮಲಿನಲ್ಲಿದ್ದ ಅವರನ್ನು ವೈದ್ಯಕೀಯ ಪರೀಕ್ಷೆಗೆ ಕಳುಹಿಸಿ, ಆ ವರದಿ ಆಧರಿಸಿ ಕೇಸು ದಾಖಲಿಸಿದ್ದಾರೆ.