ಸಂತೆಗೆ ಹೊರಟಿದ್ದ ಬಜಾಜ್ ಫೈನಾನ್ಸ್ ಸಿಬ್ಬಂದಿ: ಸಾವು!

ಬಜಾಜ್ ಫೈನಾನ್ಸಿನಲ್ಲಿ ಕೆಲಸ ಮಾಡಿಕೊಂಡಿದ್ದ ಕಾರವಾರದ ಗಣಪತಿ ಗೌಡ ಅವರು ಅಪಘಾತದಲ್ಲಿ ಸಾವನಪ್ಪಿದ್ದಾರೆ. ಕಾರವಾರದ ಅರಗಾ ಬಳಿ ಈ ಅಪಘಾತ ನಡೆದಿದ್ದು, ಅಪಘಾತಕ್ಕೀಡಾದ ಬೈಕು ಸಹ ಬೆಂಕಿಗೆ ಆಹುತಿಯಾಗಿದೆ.

ಕಾರವಾರದ ಬಿಣಗಾದ ಒಕ್ಕಲಕೇರಿಯಲ್ಲಿ ಗಣಪತಿ ಗೌಡ ಅವರು ವಾಸವಾಗಿದ್ದರು. 42 ವರ್ಷದ ಅವರು ಬಜಾಜ್ ಫೈನಾನ್ಸಿನಲ್ಲಿ ಕೆಲಸ ಮಾಡಿ ಜೀವನ ನಡೆಸುತ್ತಿದ್ದರು. ಭಾನುವಾರ ಅವರು ಬೈಕಿನಲ್ಲಿ ಸಂಚರಿಸುವಾಗ ಲಾರಿಯೊಂದು ಅವರಿಗೆ ಗುದ್ದಿತು. ಗುದ್ದಿದ ರಭಸಕ್ಕೆ ಬೈಕು ಹೆದ್ದಾರಿ ಮೇಲೆ ಬಿದ್ದು, ಬೆಂಕಿಗೆ ಆಹುತಿಯಾಯಿತು. ಗಣಪತಿ ಗೌಡ ಅವರು ಅಲ್ಲಿಯೇ ಬಿದ್ದು ಸಾವನಪ್ಪಿದರು.

ADVERTISEMENT

ಗಣಪತಿ ಗೌಡ ಅವರು ಈ ದಿನ ಕಾರವಾರದ ಸಂತೆಗೆ ಬರುತ್ತಿದ್ದರು. ಬಿಣಗಾದಿಂದ ಹೊರಟ ಕೆಲವೇ ಸಮಯದಲ್ಲಿ ಅವರ ಬದುಕು ಮುಗಿಯಿತು. ಅಪಘಾತದ ನಂತರ ಲಾರಿ ಚಾಲಕ ಪರಾರಿಯಾಗಿದ್ದು, ಆರೋಪಿಯ ಶೋಧ ಶುರುವಾಗಿದೆ. ಲಾರಿಯೂ ಗಣಪತಿ ಗೌಡ ಅವರ ತಲೆಯ ಮೇಲೆ ಹಾಯ್ದು ಹೋಗಿದ್ದರಿಂದ ಅಲ್ಲಿಯೇ ಅವರು ಉಸಿರು ನಿಲ್ಲಿಸಿದ್ದಾರೆ. ಛಿದ್ರವಾಗಿ ಬಿದ್ದ ದೇಹ ನೋಡಿ ಜನ ಮರುಕವ್ಯಕ್ತಪಡಿಸಿದ್ದಾರೆ. ಪೊಲೀಸರು ಸ್ಥಳದಲ್ಲಿದ್ದಾರೆ.