ಬೈಂದೂರು ಶಾಸಕರೂ ಮೀನುಗಾರರ ಪರ!

ಕಾರವಾರದ ಮೀನುಗಾರ ಮುಖಂಡ ದಿಲೀಪ ಅರ್ಗೇಕರ್ ಅವರ ಜೊತೆ ಬೈಂದೂರು ಶಾಸಕ ಗುರುರಾಜ ಗಂಟಿಹೊಳೆ ಅವರು ಫೋನ್ ಮೂಲಕ ಮಾತನಾಡಿದ್ದು, ಯಲ್ಲಾಪುರದ ಮಂಚಿಕೇರಿಯಲ್ಲಿ ಮೀನು ಹಾಗೂ ತರಕಾರಿ ಮಾರುವ ಮಹಿಳೆಯರ ಮೇಲೆ ಬೈಂದೂರು ಪುರಸಭೆ ಮುಖ್ಯಾಧಿಕಾರಿ ಅಜಯ ಭಂಡಾರ್ಕರ್ ಅವರು ನಡೆಸಿದ ದೌರ್ಜನ್ಯವನ್ನು ಖಂಡಿಸಿದ್ದಾರೆ. ಸರ್ಕಾರಿ ನೌಕರನಾಗಿ ಸಾರ್ವಜನಿಕರ ಜೊತೆ ಅನುಚಿತವಾಗಿ ವರ್ತಿಸಿದ ಅಜಯ ಭಂಡಾರ್ಕರ್ ಅವರ ವಿರುದ್ಧ ಕಠಿಣ ಕ್ರಮಕ್ಕೆ ಒತ್ತಾಯಿಸುವುದಾಗಿ ಗುರುರಾಜ ಗಂಟಿಹೊಳೆ ಅವರು ಹೇಳಿದ್ದಾರೆ.

ಯಲ್ಲಾಪುರ ಮಂಚಿಕೇರೆ ಮೂಲದ ಅಜಯ ಗಣೇಶ ಭಂಡಾರ್ಕರ್ ಅವರು ಬೈಂದೂರು ಪುರಸಭೆಯ ಮುಖ್ಯಾಧಿಕಾರಿಯಾಗಿದ್ದಾರೆ. ಭಾನುವಾರದ ರಜೆ ಹಿನ್ನಲೆ ಅವರು ತಮ್ಮ ಕಚೇರಿ ಸಿಬ್ಬಂದಿ ಜೊತೆ ಊರಿಗೆ ಬಂದಿದ್ದು, ಇಲ್ಲಿ ಕುಡಿದು ರಂಪಾಟ ಮಾಡಿದ್ದಾರೆ. ಅಂಕೋಲಾ ಬೇಲಿಕೆರೆಯ ಸರಸ್ವತಿ ಕುಡ್ತಳಕರ್ ಅವರು ಯಲ್ಲಾಪುರದ ಮಂಚಿಕೇರೆಗೆ ಆಗಮಿಸಿ ಮೀನು ಮಾರಾಟ ಮಾಡುತ್ತಿದ್ದು, ಅವರ ಜೊತೆ ತರಕಾರಿ ಮಾರುತ್ತಿದ್ದ ಕೆರೆಹೊಸಳ್ಳಿಯ ಸೀತಾ ಲಮಾಣಿ ಅವರ ಮೇಲೆ ಅಜಯ ಭಂಡಾರ್ಕರ್ ಅವರು ದರ್ಪ ಮೆರೆದಿದ್ದಾರೆ. ಮಹಿಳೆಯರ ಮೈ ಮುಟ್ಟಿದ ಕಾರಣ ಊರಿನವರು ಅವರನ್ನು ಹಿಡಿದು ಥಳಿಸಿ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಈ ಎಲ್ಲಾ ವಿಷಯದ ಬಗ್ಗೆ ಕಾರವಾರದ ಜಯ ಕರ್ನಾಟಕ ಜನಪರ ವೇದಿಕೆ ಅಧ್ಯಕ್ಷ ದಿಲೀಪ ಅರ್ಗೇಕರ್ ಅವರು ಬೈಂದೂರು ಕ್ಷೇತ್ರದ ಶಾಸಕ ಗುರುರಾಜ ಗಂಟಿಹೊಳಿ ಅವರಿಗೆ ಫೋನ್ ಮಾಡಿ ಹೇಳಿದ್ದಾರೆ. `ತಮ್ಮ ಕ್ಷೇತ್ರದಲ್ಲಿ ಅಂಥ ಅಧಿಕಾರಿಯಿರುವುದರಿಂದ ಶಾಸಕರ ಹೆಸರಿಗೂ ಕಳಂಕಬರುವ ಸಾಧ್ಯತೆಯಿದ್ದು, ಕೂಡಲೇ ಆ ಅಧಿಕಾರಿಯನ್ನು ಅಮಾನತು ಮಾಡಬೇಕು’ ಎಂದು ದಿಲೀಪ ಅರ್ಗೇಕರ್ ಅವರು ಆಗ್ರಹಿಸಿದ್ದಾರೆ.

ಇದಕ್ಕೆ ಪ್ರತಿಕ್ರಿಯಿಸಿದ ಗುರುರಾಜ ಗಂಟಿಹೊಳಿ ಅವರು `ಈ ಬಗ್ಗೆ ಈಗಾಗಲೇ ಮಾಹಿತಿ ಬಂದಿದ್ದು, ತಪ್ಪಿತಸ್ಥರ ವಿರುದ್ಧ ಕ್ರಮ ಜರುಗಿಸುವಂತೆ ಪೊಲೀಸರಿಗೆ ಸೂಚಿಸಿದ್ದೇನೆ. ತಾನೂ ಸಂತ್ರಸ್ತ ಮಹಿಳೆಯರ ಪರವಾಗಿದ್ದೇನೆ’ ಎಂದು ಹೇಳಿದ್ದಾರೆ. `ನಿತ್ಯದ ದುಡಿಮೆಗಾಗಿ ಯಲ್ಲಾಪುರಕ್ಕೆ ಹೋಗಿದ್ದ ಮಹಿಳೆಯರ ಮೇಲೆ ಅಧಿಕಾರಿ ದರ್ಪ ತೋರಿರುವುದು ಸರಿಯಲ್ಲ. ಅದನ್ನು ಮೀನುಗಾರ ಸಮಾಜದವರು ಖಂಡಿಸುತ್ತಿದ್ದು, ಕ್ರಮ ಆಗದೇ ಇದ್ದರೆ ಪ್ರತಿಭಟನೆ ಅನಿವಾರ್ಯ’ ಎಂದು ದಿಲೀಪ ಅರ್ಗೇಕರ್ ಅವರು ಎಚ್ಚರಿಸಿದ್ದಾರೆ. ಮೀನುಗಾರ ಮಹಿಳೆಯರ ಪರವಾಗಿ ಧ್ವನಿಯಾದ ಶಾಸಕ ಗುರುರಾಜ ಗಂಟಿಹೊಳೆ ಅವರಿಗೂ ಕೃತಜ್ಞತೆ ಸಲ್ಲಿಸಿದ್ದಾರೆ.