- Trending
- Comments
- Latest
ಹೊಂಡಗಳಿoದ ಕೂಡಿದ ಹೆದ್ದಾರಿ ನೋಡಿ ಬೇಸತ್ತ ಜನಶಕ್ತಿ ವೇದಿಕೆಯವರು ಅಂಕೋಲಾದ ಬಾಳೆಗುಳಿ ಕ್ರಾಸಿನಲ್ಲಿ ಭಾನುವಾರ ಪ್ರತಿಭಟನೆ ನಡೆಸಿದ್ದು, ಅಲ್ಲಿದ್ದ ಹೊಂಡಗಳಿಗೆ ಪಿಂಡ ಪ್ರಧಾನ ಮಾಡಿದ್ದಾರೆ. ಲಾರಿ ಮಾಲಕರ ಸಂಘದವರು ಈ ಪ್ರತಿಭಟನೆಗೆ ಬೆಂಬಲ ನೀಡಿ ಅಧಿಕಾರಿ ಹಾಗೂ ಜನಪ್ರತಿನಿಧಿಗಳ ವಿರುದ್ಧ ಆಕ್ರೋಶವ್ಯಕ್ತಪಡಿಸಿದ್ದಾರೆ.
ಅಂಕೋಲಾದ ಬಾಳೆಗುಳಿಯಿಂದ ಮಾಸ್ತಿಕಟ್ಟಾದವರೆಗೆ ಹೆದ್ದಾರಿ ಸಂಪೂರ್ಣ ಹಾಳಾಗಿದೆ. ಸಾಕಷ್ಟು ಬಾರಿ ದುರಸ್ಥಿಗೆ ಆಗ್ರಹಿಸಿದರೂ ಅದನ್ನು ರಿಪೇರಿ ಮಾಡಿದವರಿಲ್ಲ. ಈ ಹಿನ್ನಲೆ ವಿವಿಧ ಸಂಘಟನೆಯವರು ಪ್ರತಿಭಟನೆಗೆ ನಿರ್ಧರಿಸಿದ್ದು, ಜನಶಕ್ತಿ ವೇದಿಕೆಯವರು ಜನರನ್ನು ಒಗ್ಗೂಡಿಸಿ ಈ ಪ್ರತಿಭಟನೆ ಮಾಡಿದ್ದಾರೆ. `ರಾಷ್ಟ್ರೀಯ ಹೆದ್ದಾರಿ ಸಂಪೂರ್ಣ ಹೊಂಡಮಯವಾಗಿ ಅಪಘಾತಗಳಿಗೆ ಕಾರಣವಾಗುತ್ತಿದ್ದರೂ ಅದನ್ನು ಅಧಿಕಾರಿಗಳು ಗಂಭೀರವಾಗಿ ಪರಿಗಣಿಸಿಲ್ಲ’ ಎಂದು ಪ್ರತಿಭಟನಾಕಾರರು ದೂರಿದರು. ವಿವಿಧ ಬಗೆಯ ಅಣಕು ಪ್ರದರ್ಶನದ ಮೂಲಕ ಜನಪ್ರತಿನಿಧಿಗಳಿಗೆ ಛೀಮಾರಿ ಹಾಕಿದರು.
ಜನಶಕ್ತಿ ವೇದಿಕೆ ಅಧ್ಯಕ್ಷ ಮಾಧವ ನಾಯಕ ಅವರು ಮಾತನಾಡಿ `ಅಂಕೋಲಾ ತಾಲೂಕಿನ ಬಾಳೆಗುಳಿಯಿಂದ ಮಾಸ್ತಿಕಟ್ಟಾವರೆಗೆ ವಾಹನ ಸಂಚರ ಸುಲಭವಾಗಿಲ್ಲ. ಇಲ್ಲಿ ಅನೇಕ ಅಪಘಾತ ನಡೆದರೂ ಯಾರೂ ಅದಕ್ಕೆ ಕಾರಣ ಹುಡುಕಿಲ್ಲ. ಸಾವು-ನೋವು ಹೆಚ್ಚಾಗಿದ್ದರಿಂದ ಜನರ ಜೀವ ಉಳಿಸಲು ಪ್ರತಿಭಟನೆ ಅನಿವಾರ್ಯವಾಗಿದೆ’ ಎಂದರು. `ರಸ್ತೆ ಹಾಳಾಗಿರುವುದರಿಂದ ವಾಹನಗಳ ಬಿಡಿ ಭಾಗಗಳಿಗೆ ಹಾನಿಯುಂಟಾಗುತ್ತಿದೆ. ವಾಹನ ಮಾಲಕರು ಇದರಿಂದ ನಷ್ಟ ಅನುಭವಿಸುತ್ತಿದ್ದಾರೆ’ ಎಂದು ವಿವರಿಸಿದರು. ಪ್ರಮುಖರಾದ ಗೋಪಾಲಕೃಷ್ಣ ನಾಯಕ ಅವರು ಮಾತನಾಡಿ `ದಿನನಿತ್ಯ ಹದಗೆಟ್ಟ ರಸ್ತೆಯಲ್ಲಿ ಓಡಾಡುವ ಜನರಿಗೆ ತಾವು ಮನೆಗೆ ತಲುಪುತ್ತೇವೋ? ಎನ್ನುವ ಚಿಂತೆ ಕಾಡುತ್ತಿದೆ. ಇದು ಯಾವ ಸರ್ಕಾರಗಳ ವಿರುದ್ಧದ ಪ್ರತಿಭಟನೆಯಲ್ಲ. ವ್ಯವಸ್ಥೆಯ ವಿರುದ್ಧ ಜನಸಾಮಾನ್ಯರ ಆಕ್ರೋಶ ಮಾತ್ರ’ ಎಂದರು.
ಜಿಲ್ಲಾ ಪಂಚಾಯತ ಮಾಜಿ ಸದಸ್ಯ ಜಿ ಎಂ ಶೆಟ್ಟಿ ಅವರು ಮಾತನಾಡಿ `ಕಳೆದ ವರ್ಷ ಪ್ರತಿಭಟನೆ ನಡೆಸಿದ ನಂತರ ತೇಪೆ ಹಚ್ಚುವ ಕೆಲಸ ಮಾಡಲಾಯಿತು. ಅದು ಒಂದೇ ವರ್ಷಕ್ಕೆ ಹಾಳಾಯಿತು’ ಎಂದು ಅಸಮಧಾನವ್ಯಕ್ತಪಡಿಸಿದರು. ಪ್ರಮುಖರಾದ ಭಾಸ್ಕರ ನಾರ್ವೇಕರ್, ಉಮೇಶ ನಾಯ್ಕ, ನಾಗಾನಂದ ಬಂಟ ಮೊದಲಾದವರು ಪ್ರತಿಭಟನೆಯಲ್ಲಿದ್ದರು. ಲಾರಿ ಮಾಲೀಕರ ಸಂಘದ ತುಳಸಿದಾಸ ಕಾಮತ್, ಹಾಲಕ್ಕಿ ಒಕ್ಕಲಿಗರ ಸಂಘದ ಜಿಲ್ಲಾಧ್ಯಕ್ಷ ಹನುಮಂತ ಗೌಡ, ಸಾಮಾಜಿಕ ಕಾರ್ಯಕರ್ತ ಸುರೇಶ ವೆರ್ಣೇಕರ್, ವಿಜಯಕುಮಾರ ನಾಯ್ಕ, ಶಿವಾನಂದ ನಾಯ್ಕ ಅಲಗೇರಿ,ಶಂಕರ ಗೌಡ ಮೊದಲಾದವರು ಅಣಕು ಪ್ರದರ್ಶನ ನಡೆಸಿದರು.
You cannot copy content of this page
