- Trending
- Comments
- Latest
ಕರ್ನಾಟಕ ವಿಧಾನ ಪರಿಷತ್ತಿನ ಪಶ್ಚಿಮ ಪದವೀಧರರ ಕ್ಷೇತ್ರದ ದ್ವೈವಾರ್ಷಿಕ ಚುನಾವಣೆ-2026ರ ಮತ ಎಣಿಕೆ ಕಾರ್ಯ ಚುರುಕಾಗಿ ಸಾಗಿದೆ. ಮೊದಲ ಹಾಗೂ ಎರಡನೇ ಸುತ್ತಿನಲ್ಲಿ ಬಿಜೆಪಿ ಅಭ್ಯರ್ಥಿ ಎಸ್ ವಿ ಸಂಕನೂರು ಅವರು ಮುನ್ನಡೆ ಸಾಧಿಸಿದ್ದಾರೆ.
ಧಾರವಾಡದ ಕೃಷಿ ವಿಶ್ವವಿದ್ಯಾಲಯದಲ್ಲಿ ಮತ ಎಣಿಕೆ ಕಾರ್ಯ ನಡೆಯುತ್ತಿದೆ. ಅಭ್ಯರ್ಥಿ ಮತ್ತು ಅವರ ಚುನಾವಣಾ ಏಜೆಂಟ್ ಸಮಕ್ಷಮದಲ್ಲಿ ಮತಪೆಟ್ಟಿಗೆಗಳನ್ನಿರಿಸಿದ್ದ ಕೋಣೆಯನ್ನು ಅಧಿಕಾರಿಗಳು ತೆರೆದಿದ್ದಾರೆ. ಅದಾದ ನಂತರ ಮತಪೆಟ್ಟಿಗೆ ಒಡೆದು ಬಂಡ್ಲಿoಗ್ ಮಾಡುವ ಪ್ರಕ್ರಿಯೆ ನಡೆಸಿದ್ದಾರೆ. ಬಂಡ್ಲಿoಗ್ ಮಾಡಿದ ನಂತರ ಬ್ಯಾರೆಲ್‌ನಲ್ಲಿ ರಾಯಂಡಮೈಜೇಷನ್ ಬಳಿಕವೆ ಪ್ರಥಮ ಪ್ರಾಶಸ್ತ್ಯ ಮತ ಎಣಿಕೆ ಶುರು ಮಾಡಿದ್ದಾರೆ. ಚುನಾವಣಾ ವೀಕ್ಷಕ ಮನೋಜ ಜೈನ ಮತ್ತು ಚುನಾವಣಾಧಿಕಾರಿ ಕೆ ಎಮ್ ಜಾನಕಿ ಹಾಗೂ ಅಭ್ಯರ್ಥಿ ಮತ್ತು ಅವರ ಚುನಾವಣಾ ಏಜೆಂಟರು ಸ್ಥಳದಲ್ಲಿದ್ದಾರೆ.
ಕುಲಗೆಟ್ಟ ಮತಗಳ ಸಂಖ್ಯೆ ಹೆಚ್ಚಳ:
ಈ ಮತಕ್ಷೇತ್ರದಲ್ಲಿ ಒಟ್ಟು 97400 ಮತದಾರರು ಇದ್ದು, ಅದರಲ್ಲಿ 73692ಜನ ಮತದಾನ ಮಾಡಿದ್ದಾರೆ. 45161ಪುರುಷರು ಹಾಗೂ 28531 ಮಹಿಳೆಯರು ಹಕ್ಕು ಚಲಾಯಿಸಿದ್ದರಿಂದ ಒಟ್ಟಾರೆ ಶೇ 75.66ರಷ್ಟು ಮತದಾನವಾಗಿದೆ. ಮತ ಎಣಿಕೆ ಪ್ರಕ್ರಿಯೆಗಾಗಿ 14 ಟೇಬಲ್‌ಗಳನ್ನು ಅಳವಡಿಸಲಾಗಿದ್ದು, ಸಹಾಯಕ ಚುನಾವಣಾಧಿಕಾರಿಗಳು ಹಾಗೂ ಜಿಲ್ಲಾಧಿಕಾರಿಗಳ ಉಸ್ತುವಾರಿಯೊಂದಿಗೆ ಪ್ರತಿ ಟೇಬಲ್‌ಗೆ ಒಬ್ಬ ಮತ ಎಣಿಕೆ ಮೇಲ್ವಿಚಾರಕರು ಹಾಗೂ 2 ಮತ ಎಣಿಕೆ ಸಹಾಯಕರನ್ನು ನೇಮಿಸಲಾಗಿದೆ. ಎರಡನೇ ಸುತ್ತಿನ ಮತ ಎಣಿಕೆಯಲ್ಲಿ ಒಟ್ಟು 14000 ಮತಗಳಲ್ಲಿ ಬಿಜೆಪಿ ಪಕ್ಷದ ಅಭ್ಯರ್ಥಿ ಸಂಕನೂರ 6161 ಮತಗಳು ಹಾಗೂ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಮೋಹನ್ ಲಿಂಬಿಕಾಯಿ ಅವರು 4697 ಮತಪಡೆದಿದ್ದಾರೆ. ಎರಡು ಸುತ್ತಿನಲ್ಲಿ ಎಣಿಕೆಯಾದ ಒಟ್ಟು 28001 ಮತಗಳಲ್ಲಿ ಸಂಕನೂರ ಎಸ್ ವಿ ಅವರು 12,620 ಮತಗಳನ್ನು ಮತ್ತು ಮೋಹನ್ ಲಿಂಬಿಕಾಯಿ ಅವರು 9091 ಮತಗಳನ್ನು ಪಡೆದುಕೊಂಡಿದ್ದು, ಎಸ್ ವಿ. ಸಂಕನೂರ ಎಸ್.ವಿ ಅವರು 3529 ಮತಗಳ ಅಂತರದಿAದ ಮುನ್ನಡೆ ಸಾಧಿಸಿದ್ದಾರೆ.
ಪದವೀಧರ ಕ್ಷೇತ್ರಕ್ಕೆ ಎಲ್ಲರೂ ಬುದ್ದಿವಂತರೇ ಮತದಾರರಾಗಿದ್ದರೂ 4075 ಮತಗಳು ತಿರಸ್ಕಾರವಾಗಿದೆ. ಅವರೆಲ್ಲರೂ ಅಡ್ಡಾದಿಡ್ಡಿ ಮತದಾನ ಮಾಡಿದ್ದರಿಂದ ಆ ಮತ ಯಾರಿಗೆ? ಎಂದು ಎಣಿಕೆಯಲ್ಲಿ ಗೊತ್ತಾಗುತ್ತಿಲ್ಲ. ಮೊದಲ ಸುತ್ತಿನಲ್ಲಿ 2133 ಮತಗಳು ಕುಲಗೆಟ್ಟಿದ್ದು, ಎರಡನೇ ಸುತ್ತಿನ ಎಣಿಕೆ ನಡೆದಾಗ ಅದರ ಸಂಕ್ಯೆ 4075ಕ್ಕೆ ಏರಿಕೆಯಾಗಿದೆ. ಪದವೀಧರ ಮತದಾರರು ಮಾಡಿದ ಮತದಾನದಲ್ಲಿಯೂ ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ಮತ ಕುಲಗೆಟ್ಟಿರುವುದು ಅಚ್ಚರಿಗೆ ಕಾರಣವಾಗಿದೆ. ಅನೇಕರು ಸರಿಯಾದ ವಿಧಾನದಲ್ಲಿ ಮತದಾನ ಮಾಡಲಾಗದೇ ಎಡವಿರುವುದು ಬಹಿರಂಗವಾಗಿದೆ.
You cannot copy content of this page
