ಯಲ್ಲಾಪುರ | ಅವೈಜ್ಞಾನಿಕ ಯೋಜನೆಗೆ ರಕ್ಷಣಾ ವೇದಿಕೆಯ ವಿರೋಧ

ಬೇಡ್ತಿ-ವರದಾ ನದಿ ತಿರುವು ಯೋಜನೆ ವಿರೋಧಿಸಿ ನಡೆಯುವ ಹೋರಾಟಕ್ಕೆ ಕರ್ನಾಟಕ ರಕ್ಷಣಾ ವೇದಿಕೆ (ಘಜನೇಸೆ) ಬೆಂಬಲ ನೀಡಿದೆ. ಈ ಯೋಜನೆ ನಿಲ್ಲುವವರೆಗೂ ಹೋರಾಟ ನಡೆಸುವುದು ಅನಿವಾರ್ಯ ಎಂದು ಸಂಘಟನೆಯವರು ಹೇಳಿದ್ದಾರೆ.

ಈ ಕುರಿತು ಹೇಳಿಕೆ ನೀಡಿದ ವೇದಿಕೆ ಅಧ್ಯಕ್ಷ ಶಂಸುದ್ದೀನ್ ಮಾರ್ಕರ್ ಹಾಗೂ ಪದಾಧಿಕಾರಿಗಳಾದ ಹರೀಶ ಮಂಜುನಾಥ ಭೋವಿವಡ್ಡರ್ ಅವರು `ಅವೈಜ್ಞಾನಿಕ ಯೋಜನೆಯಿಂದ ಸಾವಿರಾರು ಎಕರೆ ಪರಿಸರ ನಾಶ ಆಗಲಿದೆ. ಯೋಜನೆ ವಿಫಲ ಎಂಬ ಅರಿವಿದ್ದರೂ ಸರ್ಕಾರ ಅದನ್ನು ಮಾಡಲು ಮುಂದಾಗಿರುವುದು ಸರಿಯಲ್ಲ’ ಎಂದು ಹೇಳಿದ್ದಾರೆ. `ನದಿ ತಿರುವು ಯೋಜನೆ ವಿರುದ್ಧ ಅನೇಕರು ಹೋರಾಟಕ್ಕೆ ಇಳಿದಿದ್ದು, ಅವರಿಗೆ ನಮ್ಮ ಸಂಘಟನೆ ಬೆಂಬಲ ನೀಡಿದೆ. ಯೋಜನೆ ಯಾವುದೇ ಕಾರಣಕ್ಕೂ ಜಾರಿಯಾಗಲು ಬಿಡಬಾರದು’ ಎಂದು ಹೇಳಿದ್ದಾರೆ.

ADVERTISEMENT

`ಬೇಡ್ತಿ ನದಿಯಲ್ಲಿ ಈಗಲೇ ನೀರಿಲ್ಲ. ಇಲ್ಲಿನ ನೀರನ್ನು ಬೇರೆ ಜಿಲ್ಲೆಗೆ ಒಯ್ಯುವುದು ಹಾಸ್ಯಾಸ್ಪದ. ದೊಡ್ಡವರ ಪ್ರಭಾವಕ್ಕೆ ಒಳಗಾಗಿ ಜಿಲ್ಲೆಯ ಜನರಿಗೆ ಅನ್ಯಾಯ ಮಾಡುವುದು ಸರಿಯಲ್ಲ. ಈ ಯೋಜನೆ ಶಾಶ್ವತವಾಗಿ ರದ್ಧಾಗಬೇಕು. ಹೋರಾಟದ ನಂತರವಾದರೂ ಸರ್ಕಾರ ಎಚ್ಚತ್ತು ಈ ಬಗ್ಗೆ ಸ್ಪಷ್ಟ ನಿಲುವು ವ್ಯಕ್ತಪಡಿಸಬೇಕು’ ಎಂದು ಹೇಳಿದ್ದಾರೆ. `ಎಲ್ಲರೂ ಶಾಂತಿಯುತವಾಗಿ ಹೋರಾಟ ನಡೆಸಲು ಸಿದ್ಧತೆ ನಡೆಸಿದ್ದು ಸ್ವಾಗತಾರ್ಹ. ಈ ಹೋರಾಟಕ್ಕೆ ಮನೆ ಮನೆಯಿಂದಲೂ ಜನ ಭಾಗವಹಿಸಬೇಕು’ ಎಂದು ಅವರು ಮನವಿ ಮಾಡಿದ್ದಾರೆ.