ಯಾಣ: ದೇವರ ದರ್ಶನಕ್ಕೆ ಕಡಿವಾಣ!

ಉತ್ತರ ಕನ್ನಡ ಜಿಲ್ಲೆಯ ಪ್ರಸಿದ್ಧ ಪುಣ್ಯಕ್ಷೇತ್ರ ಯಾಣಕ್ಕೆ ನಿತ್ಯ ನೂರಾರು ಜನ ಭೇಟಿ ನೀಡುತ್ತಿದ್ದು, ಇಲ್ಲಿ ಈ ಮೊದಲಿನಿಂದಲೂ ಇದ್ದ ನಿತ್ಯ ಸೇವೆ ಹಾಗೂ ದರ್ಶನಕ್ಕೆ ಸದ್ಯದಲ್ಲಿಯೇ ತಾತ್ಕಾಲಿಕ ಕಡಿವಾಣ ಹಾಕಲು ಆಡಳಿತ ಮಂಡಳಿ ನಿರ್ಧರಿಸಿದೆ. ಸೆಪ್ಟೆಂಬರ್ 27ರಿಂದ ಯಾಣಕ್ಕೆ ಬರುವ ಭಕ್ತರಿಗೆ ದೇವರ ದರ್ಶನ ಹಾಗೂ ನಿತ್ಯ ಪೂಜೆಗೆ ತೊಡಕಾಗಲಿದೆ.

ಕುಮಟಾ ತಾಲೂಕಿನ ಐತಿಹಾಸಿಕ ಕ್ಷೇತ್ರಗಳಲ್ಲಿ ಯಾಣವೂ ಒಂದು. ಇಲ್ಲಿನ ಶ್ರೀಗಂಗಾ ಚಂಡಿಕಾ ಭೈರವೇಶ್ವರ ದೇವಾಲಯದ ಶತಮಾನಗಳಷ್ಟು ಹಳೆಯದಾಗಿದ್ದು, ಗಂಟೆ ಮಂಟಪದ ಜೀರ್ಣೋದ್ದಾರ ಹಾಗೂ ನೂತನ ನಿರ್ಮಾಣ ಕಾರ್ಯಕ್ಕೆ ಆಡಳಿತ ಮಂಡಳಿ ಆಸಕ್ತಿವಹಿಸಿದೆ. ಈ ಹಿನ್ನಲೆ ಸೆಪ್ಟೆಂಬರ 27ರಿಂದ ಭಕ್ತರ ಪ್ರವೇಶಕ್ಕೆ ಇಲ್ಲಿ ನಿರ್ಬಂಧ ಹೇರಲಾಗಿದೆ. ದೇವರ ದರ್ಶನಕ್ಕೆ ಸಹ ಅವಕಾಶ ಕೊಡುತ್ತಿಲ್ಲ. ಎಂದಿನAತೆ ನಿತ್ಯ ಸೇವೆ ಮಾಡಿಸುವವರು ಸಹ ಅವಕಾಶ ವಂಚಿತರಾಗಲಿದ್ದಾರೆ. ಭಕ್ತರ ಸುರಕ್ಷತೆ ಹಾಗೂ ಕಾಮಗಾರಿಯ ಸುಗಮ ನಿರ್ವಹಣೆಗಾಗಿ ಈ ಕ್ರಮ ಅನಿವಾರ್ಯ ಎಂದು ಆಡಳಿತ ಮಂಡಳಿ ಹೇಳಿದೆ.

ADVERTISEMENT

ಯಾಣದ ಶಿಖರ ಹಾಗೂ ದೇವರ ದರ್ಶನಕ್ಕೆ ದೇಶ-ವಿದೇಶಗಳಿಂದ ಜನ ಬರುತ್ತಾರೆ. ಸಮೀಪ ವಿಭೂತಿ ಜಲಪಾತವೂ ಇರುವುದರಿಂದ ಅಲ್ಲಿ ಆಗಮಿಸುವ ಪ್ರವಾಸಿಗರು ಯಾಣಕ್ಕೆ ಭೇಟಿ ನೀಡುತ್ತಾರೆ. ಆದರೆ, ಅಭಿವೃದ್ಧಿ ಕಾಮಗಾರಿ ಹಿನ್ನಲೆ ಭಕ್ತರ ಆಗಮನಕ್ಕೆ ತಡೆ ಒಡ್ಡಲು ಆಡಳಿತ ಮಂಡಳಿ ನಿರ್ಧರಿಸಿದೆ. ಮುನ್ನಚ್ಚರಿಕಾ ಕ್ರಮವಾಗಿ ಇಲ್ಲಿ ನಡೆಯಬೇಕಿದ್ದ ಎಲ್ಲಾ ವಿಶೇಷ ಪೂಜೆಗಳನ್ನು ರದ್ದುಗೊಳಿಸಲಾಗಿದೆ. ಸದ್ಯ ನಿರ್ಣಯಿಸಿದ್ದ ಕಾಮಗಾರಿ ಸಂಪೂರ್ಣವಾಗಿ ಮುಕ್ತಾಯಗೊಳ್ಳಲು ಕೆಲ ವರ್ಷ ಬೇಕಾದಿದ್ದು, ಎಲ್ಲಾ ವ್ಯವಸ್ಥೆಯೂ ಸರಿಯಾದ ನಂತರ ಮತ್ತೆ ಭಕ್ತರಿಗೆ ಮುಕ್ತ ಅವಕಾಶ ನೀಡಲಾಗುತ್ತದೆ.

ಹೀಗಾಗಿ, ಎಲ್ಲಾ ಭಕ್ತರು ಈ ಸೂಚನೆಯನ್ನು ಗಮನಿಸಬೇಕು. ದೇಗುಲ ಹಾಗೂ ಸುತ್ತಲಿನ ಪ್ರದೇಶದ ಅಭಿವೃದ್ದಿಗೆ ಸಹಕಾರ ನೀಡಬೇಕು ಎಂದು ಅಲ್ಲಿನವರು ಮನವಿ ಮಾಡಿದ್ದಾರೆ.