ಅಂಕೋಲೆಗೆ ಬಂದ ನಾಗರಹೊಳೆಯ ಹುಲಿ!

ಉತ್ತರ ಕನ್ನಡ ಜಿಲ್ಲೆಯ ಅಂಕೋಲಾದಲ್ಲಿ ಎರಡು ಹುಲಿ ನೆಲೆ ಕಂಡುಕೊoಡಿದೆ. ಕಳೆದ ಕೆಲ ದಿನಗಳಿಂದ ಈ ಭಾಗದ ಕಾಡುಗಳಲ್ಲಿ ಹುಲಿ ಸಂಚಾರ ಜೋರಾಗಿದೆ.

ADVERTISEMENT

ರಾಷ್ಟ್ರೀಯ ಪ್ರಾಣಿಯಾದ ಹುಲಿಗಳ ಸಂಖ್ಯೆ ಹೆಚ್ಚಿಸಲು ದೇಶಾದ್ಯಂತ ವಿಶೇಷ ಸಂರಕ್ಷಣಾ ಕಾರ್ಯಕ್ರಮಗಳು ನಡೆಯುತ್ತಿದೆ. ಅದರ ನಡುವೆಯೇ ಅಂಕೋಲಾ ವಲಯ ಅರಣ್ಯ ವ್ಯಾಪ್ತಿಯಲ್ಲಿ ಎರಡು ಹುಲಿಗಳು ನೆಲೆಸಿರುವುದು ಗೊತ್ತಾಗಿದೆ. ಕೆನರಾ ವೃತ್ತದ ಕಾರವಾರ ಅರಣ್ಯ ವಿಭಾಗದಲ್ಲಿ 2026ನೇ ಸಾಲಿನಲ್ಲಿ ನಡೆದ ಹುಲಿ ಗಣತಿಯ ವೇಳೆ ಅಂಕೋಲಾ ಉಪವಿಭಾಗದ ಗುಳೆ, ಕೋಟೆಬಾವಿ ಹಾಗೂ ಮಲ್ಲಾಣಿ ಅರಣ್ಯ ಪ್ರದೇಶಗಳಲ್ಲಿ ಎರಡು ಹುಲಿಗಳಿರುವುದು ಗೊತ್ತಾಗಿದೆ.

ಕಾರವಾರ ಅರಣ್ಯ ವಿಭಾಗವು ಒಟ್ಟು 1,18,561.352 ಹೆಕ್ಟೇರ್ ಅರಣ್ಯ ಪ್ರದೇಶವನ್ನು ಹೊಂದಿದ್ದು, ನಿತ್ಯ ಹರಿದ್ವರ್ಣ ಕಾಡುಗಳಿಂದ ಹಿಡಿದು ಕುರುಚಲು ಅರಣ್ಯಗಳವರೆಗೆ ವೈವಿಧ್ಯಮಯ ಪರಿಸರವನ್ನು ಒಳಗೊಂಡಿದೆ. ಇದರಲ್ಲಿ ಅಂಕೋಲಾ ವಲಯವು 24,768.411 ಹೆಕ್ಟೇರ್ ಅರಣ್ಯ ಪ್ರದೇಶ ಹಾಗೂ ಏಳು ಉಪವಲಯಗಳನ್ನು ಹೊಂದಿದೆ. ಕಳೆದ ಮೇ ತಿಂಗಳಲ್ಲಿ ನಡೆದ ಹುಲಿ ಗಣತಿಗಾಗಿ ಅಳವಡಿಸಿದ್ದ ಕ್ಯಾಮೆರಾದಲ್ಲಿ ಎರಡು ಹುಲಿಗಳು ಪ್ರತ್ಯೇಕವಾಗಿ ಸೆರೆ ಸಿಕ್ಕಿವೆ. ಈ ಮಾಹಿತಿಯನ್ನು ಟೈಗರ್ ಸೆಲ್, ಬೆಂಗಳೂರು ಹಾಗೂ ಡಬ್ಲ್ಯುಆರ್‌ಟಿಸಿ, ದಾಂಡೇಲಿ ತಜ್ಞರು ಪರಿಶೀಲಿಸಿ ದೃಢಪಡಿಸಿದ್ದಾರೆ.

ಮಧ್ಯವಯಸ್ಸಿನ ಗಂಡು ಹುಲಿ ನಾಗರಹೊಳೆ ಅರಣ್ಯ ಪ್ರದೇಶದಿಂದ ಸುಮಾರು 360 ಕಿಲೋಮೀಟರ್ ದೂರ ಕ್ರಮಿಸಿ ಅಂಕೋಲಾ ಅರಣ್ಯಕ್ಕೆ ವಲಸೆ ಬಂದಿದೆ. ಮತ್ತೊಂದು ಹೆಣ್ಣು ಹುಲಿ ಪಕ್ಕದ ಕಾಳಿ ಹುಲಿ ಸಂರಕ್ಷಿತ ಅರಣ್ಯ ಪ್ರದೇಶದಿಂದ ಬಂದಿರುವುದನ್ನು ಖಚಿತವಾಗಿದೆ. ಅಂಕೋಲಾ ಅರಣ್ಯ ಪ್ರದೇಶದಲ್ಲಿ ಚಿರತೆ, ಕಾಡುಕೋಣ, ಕಡವೆ, ಮುಳ್ಳುಹಂದಿ, ಕಾಡುಕುರಿ ಸೇರಿದಂತೆ ಅನೇಕ ವನ್ಯಜೀವಿಗಳು ವಾಸಿಸುತ್ತಿದ್ದು, ಸಮೃದ್ಧ ಆಹಾರ ಸರಪಳಿ ಹುಲಿಗಳ ನೆಲೆಸುವಿಕೆಗೆ ಪೂರಕವಾಗಿದೆ.